一如絕大部份人所料，東方燃氣（432）因大股東電訊盈科（008）減持，噚日復牌股價受壓，一度低見0.29元，雖然最後反彈回0.315元收市，但仍然勁跌25%。
雖然小初到𠵱家都唔明，點解重有人肯接東燃嘅配股，但仍然祝福佢哋，希望股票到手時，可以守得住配股價2.65元（10合1）。
至於東燃後市何去何從就真係唔敢講，皆因就算家陣電盈已減持東燃，但東燃公眾持股量仍然未夠，解決方法唔係發新股就係再減持舊股，中線而言，亦係難睇好。
同樣係配股嘅北泰創業（2339），上周五完成配股，復牌旋即跌破2.35元配股價，但如果大家睇真啲，唔計配售股份上板，實際成交唔夠10球貨，沽壓唔算大。
北泰噚日雖未升回2.35元的配股價，但已見企穩，升2.2%，收2.325元，好快會見家鄉。
經紀黃話，由於有數個包括摩根大通在內的大芬，坐住大量北泰股份，如果佢哋唔出貨，理論上唔會有太大沽壓。
慕容小初