當奴、詩姑同林D9最近花名大膨脹，一時俾人叫做賣港三人組，一時又俾人叫佢哋做速記司司長、布景組組長同速遞局局長，認真冇癮。加埋李鵬飛噚日重多口話大班口中令佢好失望嘅朋友就係當奴，聽講曾司長真係傷心欲絕，有口難言。
幸好，三人組訓練有素，對外間所有聲討、對將來嘅歷史評價，一概面不改容，林D9重話會繼續努力「為大家服務」，一定唔會提早收檔，其面皮之厚充滿李鵬氣質，人人寫個「服」字。
心甘命抵做民主派口中嘅奴才同猶大其實真係唔容易，因為唔係人人做得到，唔怪得白鴿黨嘅張文光點咗首中國國歌「義勇軍進行曲」畀當奴聽，叫佢留意歌詞：「起來，不願做奴隸的人民，讓我們的血肉建成我們新的長城……」
今次當奴甘願「當奴隸」，唔肯起來為港人爭取，張文光話，莫非真係要香港人以「血肉長城」去保衞基本法所講嘅普選權利？
傳真︰2623-9278
電郵︰