中方一輪搶攻，大石壓死蟹奪回政改主導權之後，一踏入五月，就總動員出擊，唔放過任何抹黑民主派嘅機會，中聯辦頭五年都躲在後面，𠵱家就出晒前台，由鄒哲開、王鳳超到王如登都十分高姿態。
王如登日前重喺各界青年紀念五四運動上大講「香花毒草」呢啲文革式嘅用語，真係唔知想點。
有政界人士覺得王助理嘅訓示先至係大毒草，因為五四新文化運動係紀念德先生同賽先生喺中國出現，你王先生等土共就利用嚟反西方民主，重顛倒是非黑白叫青年人認清乜嘢「真假善惡，香花與毒草」。
政見不同，都唔使用啲咁嘅字眼，老毛當年用呢啲高帽害死不少忠良之士，大家都歷歷在目，唔記得或者一無所知白紙一張嘅青年人咪買本《最後的貴族》睇吓，就知共產黨點樣將啲知識分子迫到走投無路，悔不當初。至於清算英國人扶植代言人，就唔該留番溫總喺英國見貝理雅先講都唔遲，使乜背後中傷人。
傳真︰2623-9278
電郵︰