蔡依林啱啱同緋聞男友周杰倫去完約旦拍汽水廣告，一返到台灣，佢就即刻四出為新唱片宣傳。不過對蔡依林嚟講，平時就算忙到唔夠時間休息都唔緊要，最緊要有時間畀佢買嘢，好似日前蔡依林下晝出席完fans聚會之後，就飛奔去仁愛路嘅MissSixty旗艦店度瘋狂掃貨。
蔡依林一見到心頭好，就即刻攞上手試一餐，最搞笑係，蔡依林為咗爭取時間，竟然當眾換衫，好似做騷咁，好在佢本身有件衫打底，如果唔係就真係蝕晒大底。最後蔡依林買咗一件限量版牛仔褸、一條運動褲同一件T恤，埋單四千幾蚊港幣。而蔡依林畀完錢後，即刻搵廁所解決，原來佢為咗買衫，忍住唔去廁所，真係愛靚唔愛命！
此外，蔡依林噚日喺台北舉行簽唱會，吸引逾千歌迷，唱片公司還安排「30萬張破冰儀式」，希望蔡依林嘅唱片能衝破三十萬張好成績。
台灣天后張惠妹同胞妹Saya被傳做過陪酒女郎，報道指佢兩姊妹喺台灣一間日本小酒館陪酒。佢經理人高一秀澄清，其實嗰間日本酒館係阿妹個家姐經營，佢哋唔係喺度做陪酒，只係幫手送餐做侍應，佢重話：「阿妹的姊姊還有一間卡拉OK，但那間店子只開了兩年，阿妹近年忙巡迴演出，哪有時間去陪酒。」
2R噚日喺九龍灣出席活動，除咗宣布佢哋嘅歌迷會成立之外，佢哋重示範由歌迷設計嘅卡拉OK制服，不過啲制服全部都設計得好密實，真係埋沒咗佢哋嘅好身材。而2R就話最開心係歌迷會終於成立，因為咁就可以避免歌迷互相爭寵，真係辛苦晒2R呀！
歌神許冠傑下月喺紅館開十場演唱會，雖然門票今日先至正式公開發售，但噚日紅館售票處已經有fans排通宵買飛，另外，多個售票站亦有fans排通宵，真係瘋狂。阿Sam知道fans咁捧場當然好開心，佢諗住送fans每人一張簽名海報嚟報答佢哋喎！
關心妍（Jade）阿媽原本打算同埋對仔女以及佢嘅情人，一雙一對齊齊去菲律賓慶祝母親節，不過Jade因為唔想做電燈膽，所以就取消咗行程。Jade話好想拍拖，佢阿媽亦經常催佢快啲識番個男朋友，驚佢變老姑婆。Jade話：「老闆（羅傑承）都好擔心，佢話女仔唔拍拖會心理唔正常。」咁佢要努力啦！
方力申（Alex）噚日喺尖沙嘴舉行「全職歌手見証會」，講開梁漢文踩孔慶翔而俾人鬧單嘢，Alex就話自己係孔慶翔迷，佢話：「香港報紙未大事報道前，我已經睇過《AmericanIdols》，我俾佢講嗰句嘢感動，好鍾意佢，我都有買佢張碟，我覺得佢一啲都唔笨，唱歌唔一定好聽先可以出碟嘅。」真係人各有志！
