瑞典名將拿臣自從喺○二世界盃決賽周後退出國家隊，好多人都覺得可惜，重有唔少拿臣嘅隊友同埋名宿要求佢復出，但佢都冇應承。不過，最近呢位些路迪前鋒終於改變初衷，決定復出為國家隊踢○四歐洲國家盃決賽周。究竟，係邊位高人可以令拿臣喺國際賽掛靴近兩年之後復出呢？答案係佢個六歲嘅仔佐敦。
三十二歲嘅拿臣話：「當初我喺○二世界盃之後退出國家隊，就係因為想多啲時間陪家人，𠵱家連我囝囝佐敦都話想我復出，我當然唔想令佢失望啦！」相信瑞典球迷就一定好多謝佐敦仔，而同瑞典喺歐洲國家盃決賽周同組嘅意大利、丹麥同埋保加利亞，就多得佐敦唔少喇！
拜仁前晚反勝科隆二比一，但因不來梅六比○狂數漢堡，故佢哋之間重有六分距離。就算拜仁下仗主場贏不來梅，雙方亦差三分；拜仁總經理漢尼斯賽後猛插漢堡，暗示佢哋特登放水。但我求大俠認為，拜仁今屆確打得差，成日失分畀啲中下游球隊，家陣搵人嚟賴，真係輸唔起！
英甲米禾爾自殺入足總盃決賽對曼聯而獲下屆歐洲足協盃參賽權後，球隊就不時出現傷兵停賽，喺上星期六以○比二輸畀打比郡後，近七場聯賽三和四負，踢唔到升班附加賽之餘，目前更被列為六點五倍嘅足總盃捧盃大冷門。難怪領隊韋斯話：「我唔知隊波搞乜，表現差到冇人有！」
今屆西甲聯最傳奇球隊，可以話係季初屎波、季尾好波嘅巴塞隆拿，佢哋有復甦表現，隊長高古絕對係無名英雄；所以巴塞都好識做，雖然高古已三十三歲，但都準備同佢續約一年。高古今次可以話同喺巴塞效力嘅荷蘭兵出一口氣，證明唔係全部「荷蘭橙」都早熟早殘。
紐卡素前晚輸咗畀曼城，爭第四踢歐冠盃嘅希望受到打擊。賽後領隊老笠臣又點名羅拔同埋阿美奧比踢得差，其實我求大俠知你笠臣Sir一向睇佢兩個唔順眼，但咪忘記家陣球隊傷兵滿營，佢兩個隨時係球隊今季足協盃及聯賽前途嘅關鍵人物，咪吓吓鬧到佢哋無晒鬥志噃！