上周五美股又跌，今朝港股都好難有運行。不過港股累積跌幅已大，再跌嘅話隨時有機會反彈。國內宏觀調控影響紅籌國企，紅籌國企亦已散得太緊要，唔排除亦會有技術反彈，帶領個市上番啲。
不妨細注吼低位買恒指Call輪，正路對象係9799。上周五恒指再跌62點，好多恒指Call輪跟住跌，但9799企定，理由係啲數據比較靚。9799輪價11.9仙，9月到期，溢價5%，槓桿率16.2倍。其他可以諗嘅有9788同9773，都係9月夠鐘。
恒指Call輪稍為近期嘅，例如9099與9513，槓桿率勁好多，但溢價亦高啲。呢類輪如果撞啱恒指起幾百點，輪價會好似一支箭咁，但個市若然唔對辦，則佢哋會好似石頭碌落懸崖。賭窩輪，幾時都要記住食得鹹魚抵得渴。
美國油價高企，美國油股相對硬淨，近期跑贏大市。本港油股唔得，中海油（883）上周收2.825元，1周跌幅12%。中海油特性係跌到咁上下，芬佬會趁低吸納，踢番上去，好少一條氣直插。吼低博吓Call輪，有機會賺啲短線錢，主角係9255，7月底到期，輪價20.1仙，溢價5.4%，槓桿率7倍。
中鋁（2600）上周五最低4.25元，話咁快彈番上去4.575元，一周大散17%，博反彈，短炒9214，7月底到期，輪價72仙，溢價9.3%，槓桿率6.4倍。溢價唔算低，不過其他中鋁Call輪嘅溢價離譜得重交關。
章盛