樓市熾熱，自然吸引炒家入市圖利，美聯物業首席分析師劉嘉輝話，四月截至二十九號，土地註冊處共錄得五百四十宗摸貨（即在交易完成前轉售）個案，比起三月急升近八成，同九七年九月嘅五百九十宗有得比；假如同舊年八月低位二十六宗比，升幅就好驚人，足足差唔多升二十倍。
呢批摸貨中，向發展商買入後轉手嘅佔七成，有三百八十一宗，獲利最大嘅荃灣朗逸峯，賺幅有七成七。二手賺幅最大係西貢碧濤花園獨立屋，都係七成七。
不過，原來四月重錄得十三宗「摸上摸」嘅個案，全部都獲利離場，幅度最大又係朗逸峯，九座中層B室，第一手成交價係二百四十三萬七，以三百二十六萬轉手後，跟住再以三百九十八萬元沽出，累計升值六成四。而近日市場焦點薄扶林貝沙灣有三宗呢類登記，天水圍慧景軒就有兩宗。
劉嘉輝指出，九七年只可炒賣二手樓，𠵱家市場炒賣嘅主要係新貨，唔少係喺舊年低位入市，因樓價急升而轉售，情形同九七年唔同；但係咪算嚴重呢？佢就冇加以解釋，只係話五月呢類註冊量都會喺高位徘徊。
喺樓價升到你唔信嘅情況下，好多市民開始調校對樓市嘅睇法。
聽中原高級分行經理余志文講，一名住咗政府宿舍超過二十年嘅公務員，最近終於轉投買賣市場，用綠表買入馬鞍山錦豐苑三房銀主單位，首度做其業主。
個單位係A座低層四室，七百四十四呎，成交價八十五萬，呎價一千一百四十二元。呢名公務員，過去眼見樓市狂升暴跌都不為所動，𠵱家竟然趕入市，都咪話樓市唔熾熱。
內地再度爆發沙士，觸動本港防疫神經線，政府以至私人機構，都作出高度戒備。
置邦物業為預防出現社區感染，早已作出應變部署，面對五．一黃金周人潮增加，喺較多自由行客幫襯嘅商場，好似油塘鯉魚門廣場同尖東南洋中心等，執行比平日更加嚴謹嘅清潔同防沙士工作。
例如向商場管業處派發「衞生包」，裏面有消毒液、口罩同電梯按鈕膠片等，畀管理員按指引做好防疫工作。
沙士再度爆發，市民又要擔心經濟受挫，但係香港有一行業似乎完全唔受影響，就係物業管理嘞，重不斷擴充請人㖭，蘭西聽聞，由於呢行好景，所以有啲管業公司重諗住收購同行，壯大實力，聽講涉及收購嘅兩間公司，喺行內都有番咁上下規模，若果收購成功，肯定會變成行內嘅一哥。
近年香港流行搞展銷場，或開倉特賣場，零售商主要係租工廈或者商廈幾日，招攬消費者幫襯。
好似電盈早前就租海港城賣電腦同手機等產品，蘭西去睇過，幾日都好多人，連外國人都嚟買平嘢，證明呢個出貨方法都幾有效。
日前蘭西見到恒隆賣廣告，話喺前身係酒店嘅旺角雅蘭中心搞展銷場，招攬客戶辦展覽，重提議話可以做嘅有模型車、特色眼鏡同時尚家居用品展覽；或者係夏日時裝嘉年華，同埋運動用品開倉特賣場等。觸角果然夠晒敏銳。
商場有埋呢啲特賣場，分分鐘人流旺過一線街舖。
蘭西
電郵地址：