馬主S出席喬老爺訓話大會，聽咗一個鐘頭，幾乎瞓着咗，好彩喬老爺啲國語十分標準，句句入耳。內地大官有一個優點，就係說話能力特強，出口成文，滔滔不絕，讀稿包無錯，冇稿亦可吹牛數十分鐘。反觀特區政府啲大官、議員，無論講廣東話、國語，都如斷截禾蟲，既無文采，亦無風格，正是講人自講，聽眾頭暈。尤其是特首讀稿都會讀錯，已是無可救藥。
馬主S聽到尾，見到公子W搶步上台發言，以為有料到，點知盡是公關之言，偏離主題，與釋法、政改無關。馬主S為之咕咕聲：「今日係乜嘢場合，成千人聽你講埋啲無謂嘢？」跟住公子F上台，國語不靈光，馬主S都唔知佢講乜，於是起身借尿遁，行到出門口，聽到公子C發言，用廣東話，看似有備而來，照稿讀，但講乜嘢呢？馬主S唔知，因為唔想返轉頭再聽咯。
馬主S屬於中立搵銀至上派，有民主，梗係好；冇民主，好似港英咁做法，商界專心搵銀，馬主S又冇所謂，最緊要就係自己搵得到。佢最唔滿意嘅就係，冇民主兼冇銀搵，董特首領導糊塗，民主派又只識獨沽一味講民主，講唔到經濟政策。馬主S話：「既然喬老爺講到昔日英皇制誥，倒不如頒布一個中南海制誥，北京派喬老爺之流嚟香港做市長，全面復古，恢復殖民地舊制，五十年不變！」
馬主S咁有諗頭，唔怪得佢前一季賭馬，一場贏咗百幾萬。當日練馬師話佢隻馬有啲機會，只怕排位差、磅重、路程稍短，但講嘢之時，隻眼只望住隻馬，唔望馬主S。馬主S於是重鎚落注，果然得咗。