偉大祖國爆發毒奶粉醜聞，哄動國際，全國有成半奶粉係造假，加入毒質，啲BB飲咗，即時出現電影神奇特技效果，個頭脹到好似個南瓜咁大，十足以前有一張年畫，叫做「年年有餘」，上面着住件紅肚兜抱住條大鯉魚嘅娃娃咁，都幾趣致。
咁就將「自由行」推向一個新浪潮，大陸遊客落嚟搶購狂掃嘅最受歡迎貨品，早前嘅珠寶鑽石護膚品，經已由奶粉代替，喺尖沙嘴廣東道，經常都會見到啲自由行男女同胞，啱啱買咗幾罐超勁裝日本奶粉之後，幾個齊齊踎喺街邊，好開心咁急不及待打開啲奶粉親自驗貨，用手指拈一拈，再放入嘴巴吮一吮，幾乎笑出眼淚來，嗰種父母關愛下一代嘅本能，令人睇見真係好感動。
早嗰輪，啲港官老左猛咁矮化香港人，話香港人乜都要靠晒祖國接濟，簡直係唔知醜。估唔到一鑊毒奶粉醜聞，反而令到香港人吐氣揚眉重獲信心。香港搞唔成「高科技港」同「中藥港」，超前成為「奶粉港」都唔錯，成為英美日歐優質奶粉嘅入口基地，香港同胞同祖國人民嘅感情奶濃於水，一鑊毒奶粉，加強咗中港兩地嘅相互倚賴，並推動香港向「奶粉型經濟」轉型，係一件好好嘅事嚟。
不過，單靠祖國遊客落嚟搶購真奶粉，我哋香港又夠唔夠主動呢？八方認為都未夠。因為喺內陸邊遠地區，例如甘肅、青海、苗疆呀咁，好多同胞冇錢落香港，為咗接濟番佢哋，香港大學生應該組成「北上送奶粉愛心團」，向全國各地派送。以往好世界，奶粉當然係慈善贈品，今時今日香港唔好景，啲香港有錢Le
淨係北送奶粉唔夠。醫生話，母乳教育始終係最健康。為咗回饋祖國禁止香港雙普選、維持穩定嘅一片好心，係咪應該將香港嘅孕婦，啱啱生完仔，集中起嚟，由A1董夫人任正團長，愛國婦女團體代表林貝聿嘉做副團長，一齊北上，去大江南北，支援國家真奶短缺嘅需求，為各省嘅祖國嬰兒親自餵奶哺乳呢？
若然特區抓緊機遇，組成一支特區愛國餵奶工作團，深入推行母乳教育，咁幾十年之後，話唔定呢批飲香港人奶奶大嘅祖國兒童，個個聰明夠力，向上爬會成功做咗中共總書記、國務院總理等國家領導人，佢哋行出嚟吟詩，會失驚無神咁爆一句：「為甚麼我的眼睛含着淚水？因為我小時飲香港奶，有一顆特區的愛心」，咁就可以平衡番政務司司長曾蔭權不知天高地厚大逆犯上嘅嗰句「我係流香港血、飲香港水」嘅曲線搞港獨嘅罪行。
請國家畀個機會香港，為六百萬人自己贖罪！
傳真︰2623-9278
電郵︰