經紀陳上個月中曾作推介，話半新股中怡精細化工（2341）可以炒業績。點知隻股唔止在業績公布前炒上，業績公布後股價升得重勁，完全無視大市下跌，港股上周跌破萬二關，中怡股價則屢創新高，真係唔到你唔服。
中怡上周五最高見過1.60元，收1.59元，升3.25%，成交股數1242萬股，金額1915萬元。
中怡早排公布03年全年業績，盈利上升61.4%至5470萬元人民幣，高於招股書的盈利預測。經紀陳話，中怡業務性質獨特，加上盤數又見得人，據講因此吸引好幾個芬佬注意，加上街貨又乾，所以股價愈挾愈高。
另外，經紀陳又提到，要睇實四通控股（409），皆因隻股在淡市中動作頻頻，睇嚟唔簡單。四通上周公布03年全年業績，盈利勁升21倍，令股價一度逆市勁升。上周五，四通又公布會發行一批金額1.80億銀的可換股票據。
四通上周五股價回軟，跌2.8%，收0.70元，成交金額亦縮至532萬元。票據換股價0.52元，較市價低好多，但成交咁細，票據持有人斷估唔易成功換股沽貨。
慕容小初