青馬大橋同地鐵東涌線通車之前，大家要入大嶼山，就一定要搭渡輪入梅窩，然後再轉大嶼山巴士去唔同地方，所以，以往一提起大嶼山，大家就會諗起梅窩。而梅窩地標繼有銀礦灣泳灘、銀礦瀑布同銀礦洞，今次《短線遊》就帶大家走勻呢三個地方，然後再走鳳凰徑駁黃龍坑郊遊徑返回東涌離開。
記者：陳震霖 攝影：陳智良
模特兒：Irene、Ivan（StarAsia）
到達梅窩碼頭，去銀礦灣泳灘玩吓沙灘漫步，曬夠太陽吹夠海風，再走入梅窩鄉事會路，穿過街市行入涌口。涌口村屬古村，村內布滿大小溪流，菜田水源充足，石溪上有小孩嬉戲捉魚，一臉天真無邪，由於年輕一輩老早搬出市區搵食，剩番手無縛雞之力嘅老人家耕田過活，所以唔少菜田都豎起非常搞笑嘅「警告字句」，企圖阻嚇偷瓜賊。
到達梅窩碼頭，去銀礦灣泳灘玩吓沙灘漫步，曬夠太陽吹夠海風，再走入梅窩鄉事會路，穿過街市行入涌口。涌口村屬古村，村內布滿大小溪流，菜田水源充足，石溪上有小孩嬉戲捉魚，一臉天真無邪，由於年輕一輩老早搬出市區搵食，剩番手無縛雞之力嘅老人家耕田過活，所以唔少菜田都豎起非常搞笑嘅「警告字句」，企圖阻嚇偷瓜賊。
繼續前行，微風吹來，漸漸聽到水聲潺潺，不知不覺已經行到銀礦瀑布公園，銀礦瀑布係梅窩地標之一，大雨過後，流水激瀉拍石，氣勢磅礡；近排雨量唔算多，有遠足發燒友話可以逆布而上，不過欺山莫欺水，少啲涉澗都唔好試，倒不如帶齊食物，靜靜哋坐喺瀑布前面嗰幾塊平整大石，邊野餐邊欣賞飛瀉瀑布。
食飽飽，出番石屎路參觀銀礦洞。村民早喺1862年開始開鑿礦洞，全盛時期有4個礦洞同時被開鑿，不過後來山泥傾瀉，兼礦石含銀量太少，所以放棄開採，𠵱家只開放主洞同下洞，傳聞曾經有人失足墮洞而死，加上洞內四圍黑漆漆，倍感陰森。
原路出番碼頭，沿嶼南路向貝澳方向行，接鳳凰徑二段，橫過雙東坳、二東山。由百幾米開始上山，要走到747米高嘅二東山，少啲腳骨力都唔得，所以大家唔好勉強，一累就最好唞一唞，特別係上到無遮無掩嘅地方，就要提防中暑。
當大家走到二東山同大東山之間，萬里無雲，配山坡上嗰20棟麻石屋，個Feel正到你唔信。呢啲石屋俗稱「爛頭營」，喺私人營地，由外籍人士建於30年代，想當年大嶼山重未有嶼南路，起屋用嘅沙石全靠用人力由碼頭搬上山，諗起都覺辛苦。
中段由鳳凰徑轉入黃龍坑郊遊徑落東涌，郊遊徑最特別地方，就去到C1201標距柱位置，黃龍飛瀑出現喺右手面，500幾米飛瀑由懸崖向下奔流，勁有氣勢！
過咗標距柱，接住有逾千級石階挑戰大家腳骨力，難唔在路程，只難在斜，天梯長度短短千幾米，但要由600米高度迅速下落到100米，可想而知每級石階有幾高，落到山腳，腳都軟埋，小休10分鐘先有力再行。
出番黃龍坑道赤鱲角新村，順便參觀天后宮，呢間天后宮建於1823年，原址位於赤鱲角北面廟灣上，因為要起新機場，所以成座廟搬到黃龍坑村重建，佢係全港唯一間全用花崗石建造嘅宇廟。
由梅窩起步，步程最快都要6小時，計計吓落到東涌，足足跨越差不多半個大嶼山，征服完黃龍坑郊遊徑千級石階，出番赤鱲角新村，去到全村一千零一間菜館，即時飛撲買糧買水，補給夠先出市區。
容苑菜館（29888306）
地址：赤鱲角新村4號
去程：
中環乘渡輪入梅窩碼頭起步。
回程：
赤鱲角新村出東涌道，步行15分鐘回東涌市中心。
普通渡輪：
星期一至五成人$10.5，長者及小童$5.3
星期日及公眾假期成人$15.7，長者及小童$7.9
高速船服務：
星期一至五成人$21，長者及小童$10.5
星期日及公眾假期成人$31，長者及小童$15.5
