近大半個月來，股市受到接二連三的利淡消息困擾，消息包括1中國推出宏觀調控措施，一波緊接一波；2美國將會提前加息；3內地又再出現沙士；4大行睇淡港股；以及最新的5資金開始外流。
事實上，美國同中國要加息，已係大勢所趨，問題係時間早遲而已；而資金自由出入，現既開始外流，趨勢料會持續，但港股經已大幅調整，利淡消息還會帶來多大壓力呢？
港股由3月高位14058回落，到4月底跌到11856，下跌2202點，跌幅15.6%，亦跌穿了12000的重要支持位，此係連升11個月的正常技術性調整。一般而言，股市走在經濟前頭，除沙士係突發而不可預計者外，股市下跌，一定程度上已反映了中國經濟要降溫和美國加息的趨勢，既已「跌定先」，則港股繼續調整，幅度亦唔會大。
今次跌市，有可能「一次過」，亦可能反彈後再尋底。去年開始的大升浪，由8331升到14058，共升5727點，若調整升幅的0.382，可見11870；若調整0.5，可見11194。牛市的調整，一般不會超過前升幅之半，因此，在11194至11870之間，隨時會見底，在250日線（11569）亦有支持。
無論港股係一次過到底，或反彈後再試底，都要捱過「5窮6絕」呢兩個月，到7月先再升過。連升11個月後，調整4個月，好正常。如屬前者，就在12000水平之下整固；若屬後者，恒指可望升番幾百或一千點後，再下試250日線支持。個人看法偏向後者。
下半年的大升浪，恒指保守估計可見16000，未來兩個月的策略，可部署分段低吸。美息雖升，但本港初期不會跟足，若今年加幅在半厘以下，對整體經濟不會帶來太大影響，因此，地產股仍可列為優先選取對象，藍籌的長實（001）同新地（016）、二三線的香港興業（480）等，都可考慮。
自由行概念股同工業股亦可收集，前者有恒豐金業（870）、莎莎（178）、卓悅（653）、六福（590）同富豪（078）等；後者則屬意彩星（635），今年出口市場表現理想，盈利大增。
明天再談國企。
郭兆誠