本港經濟雖然慢慢好轉，但唔少貧窮家庭同大使呻，生活重係好艱難，根本就餐搵餐食，知道仔女鍾意睇圖書，但都冇餘錢買畀佢哋。為咗鼓勵孩童多閱讀，蘋果基金「兒童圖書送禮行動」，早排就向貧童派發益智圖書。
大使除咗收到唔少善長捐錢支持之外，近日重收到一位善長仁翁慷慨捐出四百本全新益智圖書，啱啱蘋果基金就將呢批圖書安排送贈鮮魚行學校，部份書籍更會放喺圖書館入面畀同學借閱，大使重見到啲同學個個攬住本圖書愛不釋手。
嗰位善長仁翁同大使表示，捐書嘅念頭主要係早排喺報紙睇到一段新聞，提到有個細路女同哥哥因為趕住去流動圖書車還圖書期間，妹妹意外俾駕車撞死，佢睇咗呢件咁不幸嘅意外之後，一路都好唔開心，覺得香港嘅讀書風氣好差，希望自己可以做到啲嘢……後來，善長就喺報紙度見到暖流版嘅「兒童圖書送禮行動」，結果就決定捐出一批全新兒童圖書出嚟。
善長同大使講：「我希望呢批圖書會帶畀啲學童開心，期望佢哋養成睇書嘅習慣，同埋享受當中嘅樂趣；而睇書又可以啟發思考能力。」
大使知道呢位善長並唔係大富大貴嘅人，之前佢因為生意失敗申請破產，經過一段艱難日子，幾年前佢終於同朋友搞咗間圖書公司，呢位善長喺自己有限嘅經濟能力之內仍慷慨捐出圖書，呢份心意實在非常可貴，希望各位同學好好珍惜呢批圖書，唔好辜負咗善長嘅心意。
暖流熱線
電話：29908688
傳真：23702192
電郵：
網址：