波鞋界新貴「石崎DUDE」屬大好友，連續幾年唱好波鞋巿，早前佐敦2復刻一出街即日由$899炒上$1,300，佢話高處未算高，展望年底可衝破$2,000大關，到時可能賺足一倍有多，難怪時下街童沉迷波鞋。所謂凡事去得太盡，氣數誓必早盡，唔通「石崎DUDE」唔怕爆煲？佢回應：「量力而為喇！而且炒波鞋唔似炒樓炒股票，冇得做按揭或借孖展，全部現金交易，好少會上身。加上最近連國內同胞都入巿，我哋班行家就多咗個出貨機會。𠵱家國內班新買家好勇猛，除咗有人大批掃貨返上去轉售之外，有少數真正用家買過萬蚊一對鞋仍面不改容。上兩個禮拜，銅鑼灣銀座地庫有舖頭就以$15,000賣走對巴黎Dunk，呢對鞋係第一對DunkShow會場版，原價$1,200，初時炒到$4,500，後來上到$12,000已冇乜承接力；舖主開價$15,000諗住對鞋只作為生招牌，冇諗住有人買，點知嗰日撞正有個國內潮界街童，同阿媽落去行街，經過見到啱心水就叫阿媽碌卡走人，非常瀟灑。現場有人認出佢係上海富豪嘅第二代，呢單成交當日震撼全場。」
主持人：大食Jack
八卦熱報：
