最近成為哈里王子新寵嘅加拿大Rock妹AvrilLavigne，喺感情世界入面都係敢愛敢恨，佢喺新歌《Don'tTellMe》嘅MV入面，又因為男友激到打碎玻璃，現實生活中亦聽聞佢「休」咗傳說中嘅男友。
即將推出第二張個人大碟《UnderMySkin》嘅AvrilLavigne，喺新歌入面親自寫下對感情嘅睇法重表現埋喺MV入面，就好似《Don'tTellMe》嘅MV，Avril着條好似花點內褲嘅短褲仔亮相，十分性感，唔怪得冧到哈里王子。
轉頭Avril又歇斯底里咁將玻璃杯掟向塊鏡度，一陣又赤手空拳好嬲咁打爆玻璃，極為暴力。不過，Avril並唔係亂發脾氣，佢喺呢首歌度講，自己要點樣對付啲自私嘅男人，佢曾經喺訪問度話：「有啲男仔扮晒對你好好，其實佢哋只想同你上床！」
紅咗嘅Avril𠵱家已經有車有樓，不過最令佢煩惱嘅，仍然都係愛情問題。佢喺新大碟入面好多首歌都訴說自己嘅困擾，好似《HeWasn't》講嘅係Avril嫌一個男仔唔夠體貼，就將佢飛咗，而《Forgotten》就係描寫一顆受傷嘅心點樣慢慢好番，感情成日受傷，我羅拉都戥佢心痛。