解放軍海軍八艘主要戰艦前日訪港，一班阿兵哥就好似美軍嚟香港咁，急不及待去掃貨買紀念品。不過，班解放軍唔似美軍咁去掃啲數碼相機、DVD機等高科技產品，佢哋反而盡顯愛國本色，去咗有中資背景、位於佐敦嘅裕華國貨，買手袋、手鏈同成藥做手信，估唔到班兵哥哥嚟咗香港都咁愛國，抵讚。
裕華國貨有個經理同八方講，班阿兵哥噚日下晝十二點幾同三點幾，分兩批去買紀念品，不過經理就冇透露佢哋用咗幾多錢。經理重話，佢哋態度好好，又有禮貌，唔同國內其他自由行同胞。經理重教八方點樣分辨解放軍同自由行旅客，佢話解放軍個個都剪平頭裝，幾個人一批行得好有紀律；至於自由行旅客，唔使點講大家都知啦。
除咗買嘢，班阿兵哥噚日朝重去埋金紫荊廣場參觀，唔似得美軍咁一到香港就去灣仔啲紙醉金迷嘅酒吧、舞廳。雖然話解放軍人工唔多，好難唔知慳識儉，但係嚟到花花世界嘅香港生活都咁檢點，咁低調，反映佢哋軍紀嚴明，亦都係中外文化嘅分野。
（圖）解放軍兵哥shopping之後就返戰艦，只見佢哋紀律嚴明，冇着軍服都行到好似步操咁。
傳真︰2623-9278
電郵︰