司馬燕（原名韓小玲）的胞兄韓樹雄昨日表示，梅啟明八八年以阿梅簽名的授權書向他先後借貸二百一十萬元，其間只還了五十萬元，尚餘一百六十萬欠款原分八張支票攤還，但全部不能兌現。
司馬燕的胞兄韓樹雄八八年時是元朗大生圍文苑村的地主，他昨日表示自己當年擁有兩間別墅，跟梅艷芳和胞兄梅啟明經營的狗場為鄰。韓樹雄表示梅啟明以擴充狗場以及阿梅搞演唱會需要現金周轉為由，向他借貸二百一十萬港元，但結果只還了五十萬，尚欠一百六十萬。後來梅啟明即「失蹤」十六年，直至去年底阿梅病逝，梅啟明才現身為亡妹處理身後事，韓樹雄希望可以趁機向對方追債。
韓樹雄昨日在九龍塘接受訪問，他說：「當日梅啟明喺我間別墅對面開狗場，佢日日過嚟傾偈，話要擴充狗場，想買埋我兩間別墅，佢又話阿梅咁啱又搞演唱會，需要資金周轉。我見佢係阿梅個阿哥，加上梅啟明又出示到有阿梅簽名嘅授權書，授權佢借錢同買屋，所以咪好信佢，加上佢都帶過我去佢跑馬地嘅屋企，當時阿梅都喺屋裏面，但就冇介紹，梅啟明反而介紹咗梅媽我認識。就係咁我就同佢去律師樓押咗間屋，同埋籌咗啲現金畀佢，總數係二百一十萬。」
韓樹雄續說：「我哋喺律師樓簽晒文件，佢之後幾個月都開咗好多張支票畀我，最初幾張都可以過數。但還咗五十萬之後，跟住嗰八張支票忽然彈票，佢重好似人間蒸發咁，之後冇耐就傳出阿梅同梅啟明為錢反目嘅新聞。」韓樹雄有見梅啟明失去聯絡，便往找梅媽講數，韓樹雄說：「梅媽話自己都搵唔到個仔，但佢話如果梅啟明真係爭我錢，佢一定要叫個仔還，不過之後都係採取拖字訣。」
韓樹雄有見追不到數，便報警求助，他說：「當年我去咗元朗警署報案，拎晒所有文件去。我最唔明點解佢𠵱家又可以自由出入，我都已經將資料交咗畀一個律師朋友處理，我會保留法律追究嘅權利。」
阿梅去年病逝，梅啟明即忽然返港奔喪，並發生為母親追討亡妹遺產的爭拗，韓樹雄說：「我睇報紙見到梅啟明兩母子同區議員劉家華好熟，我本身又搵唔到佢哋直接追債，所以三月時去咗搵劉家華，要求佢將我追數呢件事做中間人代為通傳，我都同劉家華留低晒聯絡方法，我都講咗只會畀一個月限期佢哋。𠵱家都五月頭，佢哋乜消息都冇。」
韓樹雄續說：「我嗰一百六十萬係血汗錢，佢兩母子都成日問人有冇良心，試問佢哋咁對我又好有良心咩？梅啟明都係因為阿梅一死先出現，梅愛芳當日病逝又唔見佢返嚟奔喪。」
記者昨日致電梅啟明，對於被追欠款事件，他說：「我都好想搵韓樹雄搞清楚條數，我冇呃佢錢，當日佢間屋我再轉賣畀一個姓黃嘅人，我開支票畀韓樹雄，姓黃嘅人答應負責入數，我都唔知佢冇入數。當時我離開香港係因為同阿梅翻臉，我迫住離開，其實姓黃嗰個人都走咗我二百萬數，我都好想搵番佢哋兩個搞清楚。如果韓樹雄同姓黃嗰個人唔主動聯絡我，唔排除登廣告尋人。」
採訪：比華利
攝影：陳慧安
