賭王父子投資嘅第二間摩卡角子娛樂坊噚日開幕，請埋彤叔一齊剪綵，大會重請咗《花花公子》舊年十月號嘅封面女郎AndreLynnChristensen到場。幾位嘉賓拉老虎機，結果當然造馬畀賭王拉中，即時獲Playmate獻吻，賭王即刻笑到鬼咁冧。
其他嘉賓就獲Playmate送私人靚相，彤叔鬼鬼馬話會將張相擺喺辦公室寫字枱上，重話後生嗰陣，間唔中都會睇《Playboy》。
而一力統籌呢間娛樂坊嘅何猷龍就話，下個月就會開第三間，「希望一年就可以回本，近期我哋生意高咗三四倍，自由行嘅客佔四成，我哋好睇好呢個市場，全世界嘅賭場有成百分之六十五收入來自老虎機，澳門就相反，老虎機只得百分之五，發展潛力好大。」
（圖）賭王獲Playmate獻吻，佢公子何猷龍（左）就拍晒手掌。
陳偉權攝
傳真︰2623-9278
電郵︰