鄭秀文（Sammi）前日出發去烏甸尼拍電影《賊公賊婆》，前晚十點鐘左右，佢兩個助手阿爽同Elinor先去機場幫佢checkin，Sammi到機場嗰陣，佢兩個就去迎接，另外重有幾名fans去送機。
之前阿爽嘅家姐爆Sammi炒阿爽又唔賠錢，於是Sammi講掂阿爽，一齊做番台戲扮冇事，重叫佢做多一個月。馮仁昭收到風，前日係阿爽幫Sammi打工嘅最後一日，所以前晚只係得Elinor陪Sammi上機。𠵱家阿爽已經攞咗幾萬蚊嘅賠償，不過新工就未有着落，但阿爽死口唔認係lastday，重話因為冇機位所以唔陪Sammi去。其實東家唔打打西家，根本就好閒，使乜搞到咁神秘呀！
另外，有周刊影到Sammi同一個做幕後嘅姓陳富家子喺中環食飯，重話佢兩個拍拖，但其實嗰個富家子係唱片監製陳輝揚，Sammi前晚笑笑口話：「都亂嚟嘅，梗係幕後啦，我食餐飯都寫成咁，真係好好笑！」
薛凱琪噚日喺銅鑼灣第一次舉行簽名會，佢雖然有幾聲咳，但都落力獻唱，之後又幫fans簽名，吸引百幾歌迷到場，成績都算唔錯。唔知係咪配合處女簽名會嘅關係，竟然有fans帶埋原隻燒乳豬送畀薛凱琪，寓意似乎有少少鹹濕，但薛凱琪又似乎唔係好知，重好開心咁捧起隻豬俾人影相。
一班歌手為小黑搞嘅慈善紀念演唱會，原定本周四同五喺內地義烏同寧波舉行。噚日大會發言人羅嘉慧話文化部已經批咗批文，但義烏嗰場就要改喺月底舉行。佢哋本來想借一千位公安到場維持秩序，但成個義烏市冇咁多公安，所以諗住跨市借公安，但因五一黃金周嘅關係又搞唔切，所以惟有改期。
許冠傑（Sam）下個月復出開騷，佢啱啱結咗婚嘅大仔懷恩，日前已經同太太Candance返港，準備喺演唱會同老竇合唱《尖沙嘴Susie》等金曲。日前阿Sam接受雜誌訪問時，大讚新抱好孝順同好識尊重佢，由於個仔同新抱重後生，阿Sam話唔心急抱孫，有個好新抱，我馮仁昭都戥佢開心！
劉青雲噚日去馬鞍山新港城中心宣傳新片《絕世好賓》，佢同一班菲傭玩得好投入，又幫BB公仔換片同着衫，幾個菲傭又載歌載舞，睇到青雲呆咗，佢話：「𠵱家啲『賓賓』真係厲害，又識唱歌同跳舞，悶悶哋都可以叫佢哋唱隻歌聽吓，不過請工人又真係好講緣份！」
