曾志偉監製的新片《江湖》上周上映，雖然遭內地禁映，但他對此片抱着很大期望。○一年志偉遇襲入院，頭上縫了二十針，此事令他學懂釋懷，不再那麼執着。
曾志偉監製的新片《江湖》上周上映，他覺得最遺憾是未獲內地解禁。當日他決定開拍以江湖恩怨為題材的電影，因為深信天時、地利及人和三個條件都是適當時期。
培訓影圈生力軍
志偉對《江》片有很大期望，他說：「我都十年冇做過監製，呢個時間啱晒，況且電影嘅低潮都去到谷底，我睇過巿場好渴求好嘅劇本，既然有就好樂意去做，我都希望可以培訓台前幕後一班新人，為影圈添生力軍。」
志偉覺得江湖片這類題材甚麼時候都可以迎合巿場，八十年代有《英雄本色》，九十年代有《古惑仔》系列，他相信今年會是《江湖》。他說：「𠵱家買飛入場嘅係十三歲到二十五歲嘅年輕人，佢哋先係主流。」問志偉可擔心意識大膽的《江》片會給年輕人帶來壞影響？他說：「其實《江》片唔係講晒江湖恩怨，華仔同學友嘅兄弟情都好深刻，除咗男人之間嘅情義，重有華仔同吳倩蓮嘅一段刻骨感情。」
志偉在圈中人緣一向不俗，但在○一年七月，志偉在酒吧遭三名大漢伏擊送院，在頭上縫了二十針。當日受傷，朋友都擔心不已，這一役令志偉清楚感受到友情的可貴。
問志偉傷愈後人生觀可有改變？他說：「可能我學佛，我了解到人生係無常，更加覺得要釋懷，呢件事我感受到朋友嘅關心同家人嘅溫情，其實我受傷都係皮肉之痛，好小事，𠵱家右額上嘅疤痕都跟住皺紋生長，一啲都唔覺，而且呢件事後都冇影響到我作息同事業發展。」
有指志偉傷愈後，整個人變得溫和，他說：「人應該隨年紀增長變得溫和，睇嘢亦會好淡，我覺得人生真係冇需要咁執着，一個唔好彩就走咗去，咁執着做乜？」志偉自覺是個知足的人，他很滿足現在擁有的一切。
談到早前與楊受成的不咬弦傳聞，志偉說：「我哋嘅友情一片空白，我覺得做朋友要交心，但如果交唔到點做朋友啫！」早前有報道指成龍為使二人冰釋前嫌，邀請志偉演出他與楊受成有份投資的電影《新警察故事》，志偉雖已答應，但最後卻沒有演出，志偉說：「我冇期嘛！」問他是否永不接拍楊受成投資的電影？他說：「冇話一世，起碼暫時唔會。」
另外，志偉很留意現今新人的表現，他說：「我覺得余文樂同陳冠希都好有突出表現，佢哋都好有潛質，演技有待發掘。樂仔嘅演繹方法就地道啲，而陳冠希因為喺外國長大，所以做戲就『鬼仔』啲，不過佢兩個都好有香港人肯學同拼搏精神。」
至於女新人方面，志偉看好何超儀和盧巧音，他說：「超儀因為家庭背景好，可以豁出去咁演繹角色，佢好有演戲天份，而盧巧音演戲時就好肯去思考同創作，多才多藝。」
採訪：比華利
攝影：林德雄
場地提供：Anytime
