呢排有雞食，過足癮。傳媒S自北京返港，約去鏞記食午飯，想食燒鵝，點知餐枱上有個紙牌，中英日文齊備，就係通知食客：對唔住，燒鵝暫停供應。傳媒S為之大失所望，因為佢經常京港兩邊走，喺北京嫌填鴨唔好食，返到嚟就想食鏞記燒鵝。請教經理威哥：「點解有雞冇鵝？」威哥嚡一聲：「當局管得好嚴，到現在都唔准鵝鴨入口，冰鮮鵝都冇。其實自九八年禽流感之後，我哋已經在內地與人合作開辦鵝場，保證供應質量，但現在真係運唔到過嚟，冇辦法，我哋差唔多日日俾旅行社嘈，外國遊客自由行上到嚟，聽見冇燒鵝，話要投訴㖭！」
傳媒S亦詐型，因為佢另一位朋友打電話去深井問，話明有燒鵝供應，叫傳媒S過去深井食飯，但傳媒S諗住下午要開會，近近哋上去鏞記食夠晒方便，點知燒鵝冇喎，有啲唔高興，質問威哥：「點解深井嗰邊話有鵝，你哋竟然冇鵝？」威哥為之苦笑：「我都唔知，總之我哋聽晒政府話，政府話有就有，話冇就冇。」
唔聽政府話唔得嘅，咁多高官到鏞記食飯，呢日就有一位羅太在此請客，又有前一哥曾先生閂埋門與老友相聚，如果賣燒鵝，碰到楊局長嘅話，點樣解畫？傳媒S聽完解釋，重係講俄文，左丁山話：「不如你下晝立即叫記者去深井或者其他地方查訪，睇吓係唔係真有燒鵝賣，有冇點你，如果其他地方有燒鵝，就可以寫新聞啦！」以前食得燒鵝多，習以為常，𠵱家食無鵝，估唔到會影響埋旅行社㖭。