今個月除咗係內地五．一黃金周外，重係母親節，商場活動零舍多，九龍倉旗下銅鑼灣時代廣場，同尖沙嘴海港城，就搞咗一連串活動，等做仔女嘅可以向母親表達感謝嘅同時，重做埋善事，一舉兩得。
時代廣場每逢大節日都會利用戶外大電視做廣播，呢個母親節就畀仔女透過螢光幕，向阿媽表達心意，送上驚喜；當日只要捐二百蚊就得嘞，收到嘅錢會捐畀公益金。
而時代廣場嘅鐘樓頂重會有音樂派對，藉此向天下母親致敬。至於喺商場內食通天消費，滿指定金額，換禮品之餘，重可以參加抽獎，有機會贏得台灣來回機票。
另外，海港城就有「媽咪陪住走catwalk比賽」活動，標題咁明顯，內容都唔使點解釋啦。
新地喺內地嘅投資愈嚟愈多，其中上海陸家嘴一項都算係重槌出擊嘅項目，但究竟正確地點喺邊，唔係咁多人知。不過，最新一期新地季刊就有披露，重有埋相畀大家睇㖭。
呢個包括甲級商廈、服務式住宅、商場同酒店嘅綜合發展項目，樓面面積有四百五十萬方呎，總投資八十億元，舊年至接收地盤發展，估計二○一一年全部落成。
市建局嘅灣仔利東街市區重建項目，喺收購業權方面遇到好大阻力，重話有意唔重建喎，嗰啲早前接受收購嘅小業主，就頭都痛埋。
蘭西聽利東街居民講，諗住市建局最快一個月就可以搞掂啲買賣手續，所以安心去買樓。點知市建局個幾兩個月都未畀到第一筆首期佢，去搵指定嘅律師問，對方就話已經唔係代表喎！幾經轉折，終於搵到市建局新聘嘅律師，但係幾乎要由頭再搞一輪，唔知幾時至可以收到錢，買咗樓嘅就要四圍撲水找數。
聽講其他小業主風聞呢單嘢之後，個個都按兵不動，但係啲樓價係咁升，擔心收到賠償都唔夠買番間似樣啲嘅舊樓，真係唔知點算。
原來市建局嘅合約寫明，喺簽買賣合約前，同小業主簽嘅文件係冇法律約束力，即係可以唔算數，而且重冇講話幾時至簽正式買賣合約。
睇嚟第日重建區啲小業主，真係要諗清楚至好接受收購嘞。
五．一黃金周會有唔少內地遊客嚟香港玩，長實早前曾講過，尖沙嘴港景匯地下商場嘅凱旋門模型，會是新旅遊景點。噚日就公布，凡喺商場購物滿百五蚊，就可以免費喺凱旋門拍照留念，送張靚相畀啲內地旅客。
雖然噚日嘅發布會，長實執行董事趙國雄無出席，不過透過電腦科技，在場人士一樣有機會一睹佢嘅法國皇室造型。人唔喺現場，都可以同現場主持大局嘅高級營業經理郭子威，同法國女郎，一齊嚟張大合照。五．一假期咁長，趙國雄都唔會日日喺度，但係如果內地客鍾意，都可以同佢影番張電腦合成相。呢次老趙可謂係繼紙牌人之後，晉級成為虛疑大使。
蘭西
電郵地址：
