今日係施祖祥努力工作三十五年後，真正退休嘅大日子，佢今日會做一日導遊，帶佢早於六八年大學時期，到日本交流時認識嘅老朋友，到西貢遊山玩水，九號就會同老婆坐船由上海去東京歎世界。
喺貿發局做行政總裁足八年，亦係離開政府後最長嘅一份工，一下子要離開，佢話「始終有啲唔捨得」。不過，做人點都要好好享受吓人生，因為冇理由「workuntilyoudrop」喎！所以早於一年前佢已準備退休，安排好接班人，以後每日可以瞓晏啲，有時間去馬會游水兼做gym，又可以打番golf，睇吓書去吓旅行，真羨慕死人。
回想當初由政府工轉做貿發局，就好似個細路仔走入玩具反斗城，有好多玩具任佢玩一樣，有好大自由度，好大滿足感。
佢八年任期內，貿發局展覽活動無論喺參展商、入場海外買家等各方面都有好大發展；其間面對最大挑戰要數去年「沙士」巴塞爾鐘表展一役，而未能完成嘅工作就係灣仔會展第三期擴建工程，因城規會未有定案而繼續拖延。
施公當年同肥彭拍檔搞新九組，但今日佢連政治新聞都冇興趣睇，佢話香港有好多地方都值得珍惜，好似自由同效率，佢好希望香港多啲祥和，少啲爭拗。但係無論如何，施公話，「我都唔會離開香港。」
八方謹祝施公上岸成功，快樂逍遙啦。
（圖右）睇施祖祥個樣咁開心，就知佢等今日等咗好耐。
傳真︰2623-9278
電郵︰