劉德華𠵱家人在天竺拍緊馮小剛新戲《天下無賊》，馮仁昭噚日喺網上睇到篇報道，話前日（二十九號）凌晨，華仔喺酒店房發現一個約二十歲嘅後生仔，當時華仔見到有個人喺床下底走出嚟，就叫保安入嚟將個後生仔捉住。
噚日馮仁昭打去問吓華仔，原來真有其事，但個版本就有啲唔同，華仔話：「二十八號晚我拍完戲返酒店，搵咗按摩師幫我按摩，我伏喺床上按到一半聽到有啲聲，重叫按摩師唔好搞我啲嘢，按摩師話佢冇，於是我起身搵吓啲聲喺邊度嚟。」
華仔拉起床單見到有個後生仔伏喺床下底，於是叫保安。後來個後生仔自爆話係華仔影迷，重話特登搭咗幾日車去天竺見佢，趁佢去咗拍戲匿埋喺間房嘅床下底十七個鐘，又冇食過嘢。
華仔於是畀啲橙汁同麵包佢充飢，又同佢講話鍾意劉德華就要做個有用嘅人，唔好做呢啲瘋狂事，最後保安登記咗佢身份證就畀佢離開。
馮仁昭問華仔當時係咪好驚，佢講笑話：「都唔算好驚，如果係隻老鼠會驚啲。」又問華仔喺大陸嘅保安夠唔夠？華仔話：「夠啦，有四個跟我拍戲，有兩個守住房門，今次係意外啫。」
容祖兒（Joey）近日為雜誌做封面女郎，早前佢幫雜誌影相嗰陣，着咗件大DeepV低胸裙瞓身影相，起初英皇擔心太性感而將佢列咗為禁相，後來先覺得啲相將Joey拍得性感健康，所以最後都批准啲相刊登，重會造埋大海報，掛喺銅鑼灣市中心㖭。另外，Joey日前推出新碟，唱片公司話首批定單已破白金，所以Joey打算請同事食飯慰勞一吓。
有雜誌早排影到吳啟華北上拍劇時懷疑召妓，早幾日佢喺曾志偉個生日會蒲過頭後，噚日又大搖大擺咁現身將軍澳電視廣播城，當佢一發現有記者就唔好老脾，一改佢以前溫文爾雅嘅態度，佢好輕佻咁話：「記者啊？」記者只不過想順道問吓佢返電視台係唔係做番《妙手仁心》系列裏面醫生角色程至美，點知佢就好惡咁話：「唔關你事！」
李逸朗（Don）噚日接受新城訪問時透露，日前到觀塘嘅公廁小解，俾四、五名中年男人圍觀，佢話：「初時經過門口已經見到佢哋，點知當我一去解決嘅時候，佢哋就走埋嚟睇我，佢哋重要笑笑口。」阿Don重話以後唔會再去公廁，計我馮仁昭話，今次俾咁多人圍住都冇事，就算佢好彩，下次真係要改吓習慣入廁格先得啦！
梅媽𠵱家住緊嘅跑馬地千呎寓所，係梅艷芳生前以三百萬買入，不過有報道話梅媽近排買咗山村道鳳輝臺，現居就以四百九十萬放盤，而且有周刊重影埋梅媽間屋㖭。不過梅啟明噚日就同馮仁昭講，佢為呢件事好嬲，因為俾記者走咗入屋，喺侵犯到佢嘅私隱，所以佢話會保留追究周刊同地產公司嘅法律權利喎。
