美國女歌手珍納積遜（JanetJackson），今年初喺美式足球超級碗大賽嗰陣搞咗單露乳鬧劇，令佢俾人炮轟咗足一個月。早排珍納去搞笑節目《SaturdayNightLive》度又再重施故技玩露乳，重攞美國國家安全顧問賴斯嚟開玩笑！
話說珍納今個月初上《SNL》參與一個短劇，佢戴住假髮着晒行政套裝，扮演月初俾人炮轟嘅美國女高官賴斯喺九一一獨立調查委員會宣誓作證嘅情況。其實我羅拉都覺得珍納幾有搞笑細胞，因為當日珍納佢扮到不堪委員嘅迫問，於是喺電視機前扯開件外衣同恤衫，露出肉色嘅胸圍，幽咗自己一默，重帶咗唔少歡樂畀觀眾。
其實珍納今次上《SNL》，主要係宣傳自己張新碟《DamitaJo》，不過至現時為止，佢張碟嘅銷情麻麻，珍納重話為咗谷下張細碟，喺新MV有大膽演出。
另外，前日珍納上咗名嘴JayLeno主持嘅清談節目度時，講講吓又同主持嘴對嘴，唔通佢隻碟真係咁差，搞到要出咁嘅招數嚟谷宣傳？