蔡少芬前晚以代言人身份為Moiselle春夏新裝展行天橋，她笑言沒有勇氣像專業模特兒般穿上三點式泳衣示人。對於有傳張栢芝會與她分一杯羹任Moiselle代言人，蔡少芬表示無任歡迎，強調自己充滿信心，不會與別人比較。
蔡少芬、落選華姐徐自賢及一班模特兒前晚齊往金鐘萬豪酒店，演出Moiselle春夏新裝展，連續六年擔任Moiselle代言人的蔡少芬前晚賣力演出，但論到性感程度則不及一眾穿上三點式泳裝示人的模特兒。蔡少芬說：「我嘅極限係露背露大腿，我重未克服到喺咁多人面前着三點式嘅心態，我都羨慕啲模特兒着住泳裝都咁自然。」
早前張栢芝穿上Moiselle晚裝出席金像獎頒獎典禮，有指她會成為品牌的新任代言人，對此蔡少芬前晚說：「人哋寫嘅唔一定要信，當然栢芝係靚女，我都好鍾意佢，不過我唔會同人比較，只會同自己比較。」問蔡少芬會否介意與栢芝共同任代言人？她說：「點會介意？呢個世界乜都會發生，影后加入重唔好呀？」
蔡少芬又表示不怕被栢芝搶風頭，她說：「呢個世界冇嘢係永遠嘅，個個都靚，個個自己都有風頭，我只會做好自己，同人比較實衰硬，人哋用我都係我有價值啫，所以一定要對自己有信心。」
此外，混血名模AnaR.前晚穿上三點式行天橋，她表示為了迎接夏天而努力keep弗，AnaR.說：「着三點式好普通啫，有時夏天熱我喺屋企都淨係着bra同埋內褲㗎啦。」
採訪：林妙萍
攝影：陳偉權
