美股連日下挫，市場竟歸咎於中國實施宏觀調控。其實中國作為世界工廠，如果唔及時進行宏調，導致生產成本因經濟過熱而上升，並向全世界輸出通脹，到時格老想唔大幅加息都好難，與其話宏調累街坊，不如說中國幫咗美國一把。美國新公布的經濟數據顯示通脹壓力增加，但經濟增長卻不符預期，若情況持續，阿虎擔心美國會出現比通脹更恐怖的滯脹。
外圍報跌，港股難獨善其身，恒指一度失守11900，收報11942，跌62點，成交162億元。國企指數曾跌至3929，Cookie話好多散戶重係唔信邪，仍然入市博反彈，結果國企指數重上4000關收市，報4061，只跌0.21%。
電盈（008）股東會通過將地產業務注入東方燃氣（432）後，電盈隨即大手配售2.37億股（10合1計）東燃，每股2.65元。雖然配售價較市價大幅折讓37%，但仍較每股有形資產淨值1.72元有溢價超過50%，除非市場認為貝沙灣售價可以倍升，又或者小小超會將私人物業免費注入東燃，否則都幾難說服到基金要貨，據聞包銷商花旗可能要坐好多貨。電盈成功配售東燃，但股價仍跌0.9%，收5.35元，唔知係咪因為呢單交易小股東冇直接得益，所以難搵人捧場。
深中航（161）傳出準備搞重組，又話會獲母公司注資，不過股價繼續冇起色，噚日再跌4.7%至1.43元。黑客話，早前聽講有中資收集深中航，但唔知係咪因為國內搞宏調，炒家缺水唔再玩。
阿虎