意大利名牌Prada昨日慶祝中環歷山大廈旗艦店開幕，設計師MiucciaPrada親臨香港主持大局。特別嘉賓李嘉欣率先穿上Prada今年三月剛在米蘭發表的秋冬新裝示人，伊人在成都趕返港，可惜航班延誤，與MiucciaPrada緣慳一面。
意大利名牌Prada旗艦店昨晚於中環歷山大廈開幕，城中名人明星空群出動，一睹設計師MiucciaPrada的風采。其中特別嘉賓李嘉欣更身穿Prada剛於米蘭三月發表、全港獨一的秋冬新裝出席，她於八時四十分抵達現場，惜MiucciaPrada已離開中環往尖沙嘴的派對現場，兩人緣慳一面。
嘉欣說：「Prada喺米蘭運咗兩套衫畀我揀，我見今年興黃色，就揀咗呢套，最近我瘦咗少少，所以腰位都改過。」嘉欣早前與古天樂往四川成都出席活動，原定昨日下午返港，豈料當地班機延誤兩小時，嘉欣與古天樂只有在機場乾等，她說：「真係心急死，我一落機就飛返屋企換衫，匆忙之間都唔記得帶相機同MiucciaPrada影相。」
問嘉欣有關王穎妤自食其力開設律師行，她說：「我冇睇報道唔知，咁咪好囉，係開心事嚟，恭喜佢？係都唔係喺呢啲場合講啦。」而富豪劉鑾雄（大劉）大前日往欣賞Chanel高級珠寶，嘉欣一聽到記者提起大劉即說：「好似同我冇關噃。」
其他出席嘉賓大部份均化身淑女，穿上Prada今季的紮染裙子，獨傅明憲以MiuMiu粉紅色裙子出現。問傅明憲上次成功與著名設計師GiorgioArmani合照，今次有否帶備相機而來？她說：「有呀，我覺得同設計師影合照重難得過同明星，我最恨同TomFord同MarcJacobs影合照。」
採訪:DebbieLum、RitaLeung
攝影:EdwardChou、娛樂突發組
