爆機狂迷：<br>《Pikmin2》問街執垃圾為還債

近排Game市非常靜，只得啲二、三線作品打游擊戰，搞到機迷同Game舖喊晒口。其實好多人都忽略咗GC啱啱推出嘅《Pikmin2》，呢隻由宮本戊操刀嘅SLG，玩法極之創新，一堆Pikmin角色又勁Cutie，包你一路玩一路發出會心微笑，加上今集新加對打及協力模式等熱鬧元素，一家大細又或男女拖友必玩！
記者：徐影龍

呢幾個月GC都冇乜聲氣，搞到隻《Pikmin2》冇人睇好，導致第一批貨源極少，首半日已沽清，好多玩過上集嘅機迷想買Game，都因為遲嚟一步而白行一趟，幸好Game舖嗱嗱聲補貨，隔兩日已經有貨返，賣價重平咗幾十蚊㖭。

古怪物品當尋寶
當年《Pikmin》一出時，因玩法新鮮而大受歡迎，其創意在於玩家控制嘅花形精靈Pikmin上，需要集合眾多Pikmin之力，周街搵寶物抬返基地，而寶物種類亦相當之爆笑，全部都係我哋人類遺棄嘅垃圾，如汽水蓋、飲品鐵罐、啤牌等，不過喺主角奧俐瑪眼中，卻是有相當價值之回收物，分分鐘值百幾二百蚊，而遊戲目標就係不斷回收地上「寶物」，再變賣嚟還清嗰10,000蚊債，否則公司隨時因破產而倒閉。

五色Pikmin各有長處
唔同顏色嘅Pikmin，都各有不同長處，要善用佢哋嘅特點征服迷宮。上集有紅、藍、黃三色Pikmin登場，玩法已經好過癮，今集重新加入紫同白兩種Pikmin，令遊戲難度變化更大，敵人種類更增加至超過60種，Boss級敵人更係超巨型，分分鐘拖住一班Pikmin都唔知點算好。
Pikmin除咗幫主角周街搬「寶物」外，重係消滅敵人嘅重要兵力。除基本數目嘅Pikmin外，當基地回收完寶物後，就會再生產少量Pikmin，漸漸地就可糾集Pikmin大軍，浩浩蕩蕩咁殺入迷宮搬嘢走。

■Pikmin有三種等級狀態，開晒花代表力量最強。

■最好閃到Boss後面狂毆，正面交鋒肯定傷亡慘重。

雙打模式鬥叠馬
除主角奧俐瑪外，其弟弟路吉亦會登場幫拖，最大作用係幫你統率部份Pikmin，分頭行事，如大佬拖馬殺敵，細佬就班齊Pikmin狂搬寶物等，玩家可隨時轉換角色嚟用，某啲關卡重要靠不斷換人嚟過關，情形就好似《BioHazard0》咁，不過更勝一籌係可作二人協力，畫面作上下分割，靈活性大增外，更講求高度合作性，幾考玩家心思㗎。
除協力玩法，當然唔少得二人對戰嘅「VS模式」，今次兩位玩家唔係拍檔，反而係鬥快爭奪迷宮入面嘅四粒「黃金波子」，秘訣除咗快速培育Pikmin大軍外，重不時遇到雙方狹路相逢，互睥後肯定大打出手！

■跟Game附送三張卡，接駁掃卡機後，便可喺GBA上玩三種MiniGame。

■二人協力模式主要係分頭行事，齊齊努力過關。

■雙打模式則為爭黃金波子，儲齊四粒就當贏。

■新加「生物圖鑑」收錄交過手嘅敵人資料，原來重可以拎去賣！