市場焦點，仍然係國內宏觀調控對國企嘅影響。國企指數散過一輪，最低3929，收市只係唔見8點。國企股中，最醒嘅係電力股。華能（902）、大唐（991）同華電（1071）全部都有得升。華電冇窩輪掛牌，其他「兩電」啲Call輪，有份打入龍虎榜。
華能升15仙，Call輪9913、9456、9746，升幅由11.8%至12.4%。9913下月初到期，輪價2.50元，負溢價1.5%，槓桿率5.8倍，講數據，呢隻唔錯，交投太疏係缺點。9746今年9月到期，輪價95仙，溢價16.1%，槓桿率15.4倍，呢隻易買賣，有近9球易手，雖然槓桿率夠大，但溢價唔低，唔多博得過。
大唐升15仙，Call輪9287與9401俱升約10%。9401今年7月到期，輪價92仙，溢價0.3%，槓桿率6.6倍，若然睇好正股，呢隻博得過，將近平水，輪價會跟貼正股。9287壽命比9401短半個月，輪價51仙，溢價6.7%，槓桿率12倍，值博率冇9401咁高。
利豐（494）與德昌（179）兩隻出口股逆市。利豐Call輪9134收7.8仙，升11.4%，3個月後到期，溢價13.4%，槓桿率15.6倍，數字唔吸引。望正股升十幾個巴仙，唔多實際。
德昌Call輪9700收4.6仙，升12.2%，8月到期，溢價44.3%，槓桿率15倍。過多一排，隻輪好易變成1仙求售，有出冇入。
章盛