普選妖獸魔族包括普選特首及普選立會，於二○○四年四月二十六日下午被宣布死亡，同告歸天，萬民歡呼！普選特首乃未出世的妖獸BB一名，懷胎六年多後終於死於人工流產。普選立會乃曾經出了世一陣後來被「監生」塞番入個肚裏面的妖獸BB一名，亦是死於人工流產。
普選特首及普選立會被「專政保衞隊」認為是為禍人間的大妖獸，他們的出現將有如鄰國歷史上出現的大型破壞怪獸「哥斯拉」般震動經濟，踐踏社會各階層，令社會變得更問責、公平、法冶及有良知，極之恐怖！普選妖獸魔族的降臨將會嚴重破壞香港社會跌序，勢必令香港文明倒退五十年！
「專政保衞隊」為了保衞香港人，派出了一支人材濟濟及配備精良的「落仔」部隊，以快刀亂咁片方式進行人工流產，更保證普選妖獸魔族在二○一二年之前不會再出現，令商人放下心頭大石，並可繼續安居樂業。
保衞隊副隊長曾經講過：「普選妖獸！今次對你來說，你可能覺得不是一個終點，而是另一個起點。不過我可以講畀你聽，當你下次就快到終點嘅時候，你又會被我哋拖番去起點！哈哈哈！專政保衞隊保衞專政是絕不手軟的，哈哈哈！」
「專政保衞隊」！努力啊！全人類嘅希望都靠晒你哋啦！普選妖獸魔族已經破壞咗地球上好多國家和城市，香港係唔可以失守畀普選妖獸嘅！副隊長，努力啊！你好靚仔啊！