唔好話小初把口唔收，睇淡東方燃氣（432）配股反應。聽講噚日電訊盈科（008）配售東燃股份嘅反應真係非常一般，分分鐘會以下限定價。
經紀黃話，今次電盈配售東燃嘅手法，同上次和黃（013）減持和記環球電訊（757）如出一轍，都係唔可以即時沽得，而係要各位再坐一會。試問家陣咁嘅市況，大家都唔知收到股票時，個市會變咗乜嘢樣？就算折讓再大都未必好吸引，加上上次接咗和記環電嘅投資者，股票未到手，帳面已經輸大錢，真係見過鬼都怕黑。
目前咁嘅市況，可以逆市上升嘅股票實在唔多，其中一隻就係基金股林麥集團（915），原來公司喺周一開始進行股份回購，不但令股價有支持，兼且重逆市上升。林麥噚日再升7.7%，收3.15元，但成交唔大，只得127萬元。
雖然林麥起碼到６月尾，先至會公布全年業績，但最近已經有證券行幫佢出報告，估佢業績會唔錯。由於林麥持有大量現金，用些少錢回購支持股價，無論對大小股東都係好事。
慕容小初