聽日五一勞動節，想短線遊嘅話，不妨近近哋到深圳南嶺求水山度假村玩番日，村內有新開嘅「工農紅軍長征園」，等你透過蠟像場景了解何謂「二萬五千里長征」，睇完再上一比一仿古長城影靚相、坐纜車飽覽深圳全景、去客家民俗園睇勁似真人嘅蠟像，全場差不多二十個景點，驚你玩唔晒。
記者：陳真 攝影：王仁
模特兒：Sue、Wing（StarAsia）
講最新景點，度假村有數月前開放嘅「工農紅軍長征園」，園內有一系列蠟像場景，將中國史上最具影響力嘅歷史事件「二萬五千里長征」重現眼前。話說當年國共內戰，中國工農紅軍主力為避開蔣介石為首嘅國民黨攻擊，從長江根據地大轉移至陜北，由1934年10月開始，至1936年10月結束，歷時2年，行程有成二萬五千里，途中要克服十幾座海拔超過4千米嘅雪山、橫越共5百公里沼澤水草地……想了解祖國第一代領導人毛澤東點樣排除萬難，克服艱辛，入「長征園」睇睇就乜都清楚晒喇。
南嶺原身係客家村落，參觀「客家民俗園」，就可以了解以前客家人嘅衣食住行同風土習俗，裏面所有場景，人就用蠟像做，好神似，農具就係實物，摸上手好有質感，雞牛豬直頭係動物標本，望落好似活生生嘅動物，勁逼真。
無時間去北京參觀真長城？嚟深圳頂住癮先喇。「仿古長城」全長380米，有4個烽火台，就咁行長城確實平淡咗少少，想過癮啲，可以租件皇帝龍袍、格格服飾、少數民族服裝（每套?5），着上身先上長城影靚相，皇帝拖住妃嬪向下望，幻想大地在我腳下，個Feel當堂唔同晒。老實，長城話長唔長，話短唔短，加上梯級又高，行晒成條長城都咪話唔索氣。
Sue忽然說：「深圳就行得多，深圳全景有無得睇先？」Wing即刻帶Sue一齊坐度假村內嘅觀光纜車。纜車全長400米，由山頂到山腳，坐一程要6分鐘，天朗氣清，大半個深圳市都睇得晒。落到山腳，兩人即到怡心湖扒艇仔、去百鳥園睇雀仔，全度假村有差不多二十個景點，想一日玩晒都難。
點解度假村叫「求水山」？唔好亂估，「求水」絕對唔係撲水咁解，話說好耐之前，住喺南嶺村嘅客家人飽受旱災之苦，農作物嚴重失收，所以全村上山祈求雨水，誠心向上天祈禱，最後感動蒼天，落番幾場滂沱大雨，南嶺村先得以苟存至今。
改革開放前，南嶺村村民每人年均收入不足?100，到1999年，全村經濟純收入已達7,200萬，當年南嶺村集體經營度假村，最後決定起用「求水山」呢個名，一來念舊，二來勸勉村民要繼續努力，唔好懶散咁話。
求水山度假村
地址：深圳市龍崗區布吉鎮南嶺村求水山公園
電話：（86）755-28701999
入場費：大人?20，小童?10。
度假村「偉人徽章」展覽館重有樣巴閉嘢，巴閉到入《健力士紀錄大全》。兩張徽章拼圖，一幅叫「回歸圖」，用1997枚毛澤東肖像徽章拼成，花1個月時間準備，慶祝當年香港回歸祖國懷抱；另一幅叫「團圓圖」，用徽章拼成中國全境地圖，兩圖都破咗《健力士紀錄大全》嘅「最大像章拼圖」項目。展覽館重展覽咗1萬3千幾枚徽章，有啲重係中國領袖毛澤東、周恩來、鄧小平嘅肖像㖭。
出番深圳市中心搵食，去酒家食正宗客家飯，必食荔茸炸大腸，芋頭味道香濃，炸大腸鬆脆，梅菜扣肉都唔錯，肥肉同瘦肉，一層夾一層，咬落去，只有甘香，無咩肥膩。
客家王
地址：深圳市羅湖區友誼路6號
電話：（86）755-82173228
交通：羅湖商業城乘的士（約?20）直達。
自己去：
羅湖商業城地庫巴士站對出露天巴士站，乘106專線巴士（?3），南嶺花園站落車。
跟團去：
旅行社：巨人假期
收費：$98（包國內交通，午膳，小費及度假村門票）
行程：羅湖口岸集合，先遊深圳蓮花山公園，續往山頂參觀鄧小平塑像，尾程遊覽求水山度假村。
查詢：27399786
