期指結算日果然係大跌收場，恒指收市險守12000大關，跌159點，最低潮之時，曾經跌過267點，低見11898。中央冷卻經濟，溫總再出招，加上外圍股市大跌，淡友遂借勢踩到盡，期指36000多張等平倉，條數都幾「融」。
結算之後，照計應有反彈。恒指噚日最低11898，已幾乎補回去年11月底的上升裂口，「穿一穿」萬二大關，有可能係短期嘅「最後一跌」。不過，家下形勢突然之間好似變得好惡劣，要博反彈，有信心者不妨小試；冇信心者，繼續觀望可也。
其實，講到調控，投資過熱的行業要提高投資項目自有資金的比例，唔少「博懵」違規借貸擴張的項目會被「拉下馬」，競爭對手減少，行業發展更為健康，對現有經營者有利。
正如溫總下令停建的江蘇大型鋼鐵項目，設計能力就達840萬噸，幾乎係馬鋼（323）去年總產量之半，此鋼廠投資高達105億元，但在審批及徵地方面都嚴重違規，成為首個被中央官員高調叫停的大型項目。同時，中央亦已下令，投資過熱行業的違規低水平重複建設項目要一律停建，而已建成的就一律停產，全面清理措施無疑有助「合規」企業的經營。
五一黃金周酒店訂房爆滿，大部份加價10%至20%，而相比兩年前，三四星級酒店的房租更有漲逾1倍者，大酒店（045）旗下香港的兩間酒店，5月份的訂房數字亦好理想。
半島酒店去年的入住率平均係53%，房租則為2337元。今年首兩月，入住率已上升至59%；到今個月，入住率再升到75%，平均房租2600至2700元，預期5月份入住率仍可企於高水平。至於九龍酒店，入住率更升上90%水平。
酒店業好景，地產市道亦進入上升周期，03年度（12月結算），大酒店每股資產淨值9.59元（已就去年10月發售新股作出調整），計及今年首4月酒店和豪宅升值的因素，每股資產淨值可上升至11.6元，大酒店噚日除息收4.85元，折讓高達58%，可趁低收集，今年目標價6元。
郭兆誠