荷蘭國家隊喺星期三嘅友賽以四比○輕取希臘，身為荷蘭躉嘅我求大俠，當然高興啦，不過，見到佢哋喺曼聯前鋒雲尼斯達羅缺陣下，都踢得咁有form，就有啲擔心雲佬喺國家隊嘅前途。
其實唔好話喺國家隊吖，目前養緊傷嘅雲佬𠵱家喺曼聯嘅前途都唔係咁光明。據講佢唔單止同領隊費格遜唔咬弦，早輪隊長堅尼重公開話雲佬狀態下滑，連累球隊成績，而最近就話佢同隊友貝利安操練時講手，唔怪得會傳「紅魔鬼」以三千萬鎊（約四億二千萬港元）將佢掛牌，賣畀皇馬或者巴塞隆拿。
我求大俠就覺得，如果雲佬喺曼聯真係咁唔如意嘅話，轉吓環境都係好事，話唔定重可以令佢嘅國家隊事業有起色呢！
國足終於打開勝利之門，一球小勝阿爾及利亞，同日韓、日友賽都唔使輸一齊咁威真係好難得，國足可以贏夠兩球，點知前鋒李毅主射十二碼宴客，亦因為佢「托迪式」極刑射法扮瀟灑，賽後俾教練阿里漢鬧到暈。國足友賽不嬲入球少，好心就唔好玩技術，認真啲處理啦！
南特黑過墨斗，繼冇耐前喺法國聯賽盃決賽踢成一比一，互射十二碼輸畀索察後，禮拜三又喺法國盃準決賽踢到各一言和，再以互射十二碼向聖日耳門稱臣。由於南特喺法甲排到第七，落後可參加來屆足協盃嘅第四位歐塞爾成七分，所以呢場波判佢哋死刑，就即係話佢哋今屆已經玩完。
今夏舉行嘅雅典奧運，觀眾又可以睇到瑞典乒乓波名將瓦爾德內爾嘅風采。事關瑞典奧委已批准佢同另外兩名老將卡爾森及皮爾遜，一齊參加奧運會。我求大俠都知佢哋三個喺乒壇個朵響，但弊在年紀都好大，瓦爾德內爾將近四十。照咁睇，瑞典嘅青訓唔係做得幾好喎！
英足總日前判罰喺兩個禮拜前對森林攞紅牌嘅米禾爾前鋒迪基奧停賽三場，由五月一日生效。迪基奧唔可能喺五月二十二日場足總盃決賽鬥曼聯；聽聞迪基奧面紅牌好冤枉，連森林領隊堅尼亞都幫佢講好話，但英足總就唔理。米禾爾冇咗佢同提早收咧嘅梅斯卡，想爆冷都幾難。