李彩樺（Rain）最近與黎諾懿在新劇中扮演一對鬥氣冤家，她坦言每次拍戲時，都會愛上對手，難怪Rain聲言好愛黎諾懿。而她雖然確曾愛過林峯，但當她抽離角色後，便會知道對方並不完美。
李彩樺在劇集《下一站彩虹》中與無綫力捧小生黎諾懿飾演一對終日鬥嘴的小情人，日前她在尖沙嘴接受訪問時，坦言因為拍戲投入的關係，在鏡頭後也不時跟黎諾懿鬥氣，當問她是否會戲假情真，Rain不諱言說：「會㗎，好愛㖭！人哋扮你男朋友，你唔愛佢效果就好假，我會當佢係男朋友，全世界最正嗰個就係佢。」
Rain揚言拍《下》劇時確曾愛上黎諾懿，而她之前與林峯拍電影《別戀》及劇集《雲海玉弓緣》時，亦盛傳兩人戲假情真。問Rain是否會愛上每個飾演其男友的演員時，她即點頭，但補充說：「拍戲時候會好愛，但收工之後唔會諗啦，因為已經好攰，返屋企即刻瞓覺，況且大家拍完戲，你會見到嗰個人唔係想像中咁完美，咁就好易抽離。」
林峯曾表示待Rain如細妹，Rain聞言即笑說：「咁我都當佢係阿哥。」她坦言現在已甚少跟對方聯絡，她說：「拍嘢時大家好friend，之後都各有各忙，好少見，傳出緋聞係會令大家有啲避忌嘅。」因為緋聞而影響友情豈非可惜？Rain說：「預咗啦，大家認識係緣份，唔好咁計較有冇得發展。」
對於與前VRF組合成員丁子高傳緋聞，Rain再次強調說：「呢件事係一個笑話，要喺我字典中消失，𠵱家我只係想畀心機做嘢，要事業唔要男朋友，感情嘅嘢隨緣，我拍拖就視對方為結婚對象，唔鍾意愛情好似煙花，靚一陣間就冇咗，我好希望能夠有一段完美嘅愛情。」
採訪：朱倬誼
攝影：何國豪
化妝：Deborah
髮型：Bluedy（HipHairCulture）
服裝：A/X
場地：ClubHavana
