戲水好甜蜜　失戀好辛苦
占爺洗腦甩肥溫　後悔莫及

下月喺本地上映嘅電影《無痛失戀》，男主角有搞笑巨星占基利（JimCarrey），女主角有琦溫絲莉（KateWinslet），加上善玩天馬行空意念嘅MV鬼才導演米高甘捷（MichelGondry），令呢排身形fit咗嘅肥溫喺電影中，竟然同情人占爺喺洗手盆度鴛鴦戲水，既香豔又搞鬼。

療程開始冇得救
《無痛失戀》講述占基利飾演嘅阿祖，有日發現情人琦溫絲莉扮演嘅海迪，竟然幫襯咗一間洗腦公司，將兩人之間所有嘅戀愛回憶都洗晒，重遇阿祖時竟完全唔識佢！阿祖一怒之下，決定將有關她的記憶都洗去，以免再想起傷心事！當療程正式開始，阿祖先至發覺有啲同海迪嘅開心事想留番低。但係洗腦過程一經開始就唔能夠返轉頭，搞到佢唔知點收科。
《蜘蛛俠》女主角姬絲頓丹絲（KirstenDunst）同《魔戒三部曲》男主角伊利亞活（ElijahWood）亦一改戲路，喺片中扮演提名過金像影帝嘅男星湯韋堅遜（TomWilkinson）嘅洗腦助手。曾為Bjork同KylieMinogue拍MV嘅導演米高甘捷，處理畫面出神入化，加上《玩謝麥高維治》嘅編劇查理考夫曼（CharlieKaufman），今次花三年時間完成這個故事，實行玩轉人類戀愛記憶。