大市噚日又大跌，小初哭股喪之餘，仍諗緊點解北泰（2339）能夠在淡市中批股集資超過兩億元。經紀黃又有新料到，今次消息相當得人驚，就係輪到東方燃氣（432）搞批股，傳聞批股價較市價折讓超過三成，涉及金額講緊好幾億咁多。
電訊盈科（008）噚日先至在股東會上獲批准注入地產業務畀東燃，交易尚未正式完成，咁快就搞批股，確係令小初相當意外。究竟呢批貨係來自電盈減持，以滿足公眾持股量，定係來自舊大股東中策（235）套現？佢就話冇問清楚，皆因佢根本冇諗過要貨，但唔排除有個別眼光獨到嘅投資者覺得掂。
東燃噚日逆市上升3.7%，收0.42元，出奇咁好表現，事後諗真啲，先至覺得有古怪。但經過上次和記環球電訊（757）批股一役，絕大部份捧場客都輸到眼光光。呢一系嘅注資神話破滅後，小初唔相信重有散戶走去接東燃咁冒險。
慕容小初