個市又再散過，恒指勉強守住萬二大關，成份股得中電（002）、港燈（006）同德昌（179）微升，冇升冇跌嘅得隻中移動（941）。
宏觀調控加大力度，國企股繼續成為火種，中企指數Put輪意氣風發不在話下。國企指數喺下晝開市冇耐，插到3985，埋單上番4069。市場估計國企指數下試4000，已經到位。好多國企已經超晒賣，隨時有力反彈，𠵱家至買中企指數Put輪，可能遲咗。
死火輪排頭位係滬杭甬Call輪9304，由8.3仙散到2.5仙，正股（576）只係由5.75元跌到5.05元。隻輪得番10日交投，溢價19.3%，槓桿率202%，望正股幾日內升到6元以上，唔實際，遲吓市場又多1隻作廢窩輪。滬杭甬啲Call輪，冇隻買得過，隻隻溢價都過高。
中遠太平洋（1199）跌5.1%，有兩隻中遠Call輪上咗死火榜。9203收25.5仙，散46%，5月底到期，溢價8.6%，槓桿率40.2倍，時日無多，有6成以上機會作廢。9187冇成交，沽家掛低49%都冇人要，隻輪作廢機會超過9成，理由係下月28日夠鐘，溢價16.5%，望正股有16.5%升幅唔實際。過埋今日，就係5月份，5月份一批高溢價嘅Call輪，大部份會變為廢紙，咪手多。
章盛