香港唔少家庭都有僱用菲律賓女傭，一般表現都唔錯；恒基地產馬鞍山新港城中心商場，喺5月1日舉辦「最佳菲傭選舉」，由電影「絕世好賓」男主角劉青雲任評判，參賽者要接受連串測試，包括廚藝、湊BB同天才表演，真係要多才多藝至得。唔知到時得獎嘅菲傭會唔會即時成為挖角對象呢？
恒基搞呢個活動，都係想吸引本地同自由行客啫，所以當然唔少得送禮啦，喺商場兩間不同商號消費滿四百蚊，就可以換到「絕世好賓」戲票一張、海報或禮品。
新港城中心喺復活節搞活動，令期間人流增加一成幾；佢哋預期五．一黃金周嘅人流量有兩成增長。
另外，新地就喺五．一黃金周同母親節期間，請嚟中國藝術體操國家隊十名女隊員，首度來港，喺旗下九個商場表演體操。呢隊體操隊來頭唔細㗎，曾經喺○一年巴西舉辦嘅四大洲錦標賽中，攞到團體項目全隊冠軍同單項冠軍。今年8月重會遠赴雅典參加○四年奧運會。
自由行對香港零售市道帶嚟幾多益處，唔使蘭西多講，好似上個禮拜兆安李太以一億一千八百萬賣出，銅鑼灣駱克道四百八十七號至四百八十九號相連舊樓，轉手只不過一星期，就再以一億三千萬摸出，上手買家七日賺一千二百萬。物業五年間升值78%。
市場傳出，新買家係人稱「阿爺」嘅鎮金店老闆吳鎮科或有關人士。物業五層高，總樓面一萬一千呎，每呎售價一萬一千八百幾蚊，地舖租畀兩間餐廳，月收三十五萬。
獅子會早前新增一個屬會「香江獅子會」，日前舉行就職典禮，利嘉閣董事總經理何紹章係該會嘅創會會員，兼義務秘書，當晚重做埋司儀㖭。聽何紹章講，原來佢喺七七年開始，已經係獅子會嘅活躍會員，多年嚟都有參加慈善活動；今次佢用咗差唔多三個月時間，嚟籌備呢個就職典禮。呢啲會可結識到唔同階層人士，對佢無論係工作同人生閱歷都好有幫助。
中原早排由集團內部靚女推廣嘅掌上地圖軟件「HK自由行04版」，果然好受歡迎，出咗幾個月，已經賣出三千幾套。最近市場竟然有老翻賣，二十蚊就有交易，比起正版二百三平好多。聽中原張奕威話，早幾日聽聞街外有佢哋嘅老翻碟賣，於是買隻研究吓對方點樣拆解中原嘅軟件，等第日可以防範；結果發現隻老翻碟只拆得一半，即只係可以用喺palm度，視窗就用唔到。
由於呢套軟件係同政府合作嘅，所以中記已經通知地政署同海關，由政府負責跟進處理。
蘭西
電郵地址：
