若然你向來有留意世界車壇動態的話，相信都會知道德國寶馬車廠，會為旗下嘅Mini推出開篷版本，但當時並無公布會否為至頂級嘅CooperS型號，推出開篷版，或多或少令一眾MiniFans感到失望。
不過各位MiniFans唔使咁快大叫「無癮」，因為廠方已於日前宣布，佢哋會喺嚟緊5月25日響英國舉行嘅TheSundayTimesMotorShowLive中，展出會於八月底響當地發售嘅MiniCooperS開篷版本；驟眼望落去新車與原有硬頂版相近，但改換上一個全自動嘅軟篷頂配搭，再襯以四輪16吋跑車合金胎軨，賣相頓時變得魅力十足，而車廂配搭亦會與硬頂型號相近。
唔講唔知，原來新車用嘅一台1.6公升直4Supercharger引擎，馬力及扭力輸出分別達170ps/6000rpm，同埋22.4kgm/4000rpm，比硬頂版多出7匹馬力及1.0kgm扭力，因而令車子起步加速反應更敏捷，難怪佢0至100公里加速度，僅為7.4秒咁快啦！唔知身處香港嘅車迷，有無機會與之見面呢？
記者：鄭達基