蔡依林（Jolin）早排同成班百事星去約旦拍廣告，傳出話周杰倫（Jay）同陳冠希（Edison）為咗佢爭風呷醋，噚日蔡依林出席記者會，親手做HelloKitty朱古力，講到Edison，大讚佢有一雙係女仔都心動嘅電眼，就算唔放電都迷死人。
Jolin話：「我跟Edison早在頒獎典禮上就認識了，他人很開朗，又愛搞笑，我們是滿聊得來的朋友。」Jolin講到對Edison好有好感咁，至於阿Jay究竟有冇同Edison爭寵？蔡依林就話同阿Jay係好朋友，其他乜都唔肯講，不過蔡依林咁樣讚Edison法，唔知阿Jay又會唔會呷醋呢？
今次Jolin首次做朱古力，並唔係送畀Edison或者阿Jay，而係用嚟送畀歌迷。Jolin係超級HelloKitty迷，噚日佢重出動私伙Kitty圍裙、Kitty蛋糕模型同Kitty鍋。完成之後Jolin好開心咁笑住問：「我們像不像Kitty姊妹花？」佢重話母親節整朱古力畀媽咪都唔錯。
唐季禮前晚喺尖沙嘴出席「最強李小龍電影全集發佈會暨猛龍過江」首映禮，唐季禮𠵱家籌備緊同成龍合作嘅新戲，下月底開拍，成龍早排踩台灣選舉而惹來不滿，問唐季禮驚唔驚部戲唔可以喺台灣上？佢就話唔使驚，藝術同政治唔應該拉埋一齊講，而且部新戲亦唔會去台灣拍，只係會去印度同內地拍外景。
王家衛執導嘅《2046》前晚喺銅鑼灣一間餐廳開工，有大批着住懷舊服裝嘅臨記喺現場出現，雖然啲工作人員話係拍製作特輯，但馮仁昭就聽聞套戲根本未拍完，下個月重要拉隊去泰國拍外景。
不過康城電影節喺下個月中就舉行，馮仁昭唔明套戲到時點趕得切去參賽啦。
成家班十幾位成員噚日去咗謝偉俊位於中環嘅律師行舉行記者會，重大鑼大鼓咁有埋醒獅活動，但點解佢哋同謝偉俊有關係？原來聽日五一勞動節，成家班會喺時代廣場舉行醒獅活動，宣揚香港繁榮，而謝偉俊則負責幫佢哋申請場地，佢重話會拜成家班為師學功夫㖭。
不過白韻琴喺旁邊話成家班其實已經解散咗，𠵱家有個新名叫「成家班超人組」，都唔知真定假。
無綫呢輪人心惶惶，有員工俾公司炒魷，亦有人係咁坐直升機，好似啱啱升咗做總經理嘅陳志雲，肯定係呢期無綫嘅大紅人。
另外一位大紅人就當然係樂易玲，製作資源部副總監區大鈞離職後，無綫噚日公布咗佢個位由樂易玲坐，以佢嘅走勢，睇嚟佢好快可以坐正做總監，代替趙崇文以前個位。睇嚟以後會係方逸華嘅王朝開始，成績會點，大家放長雙眼睇囉！
