盧巧音昨日到將軍澳電視廣播城拍攝新劇，一直十分痛錫契細佬周永恆的她，得悉其女友趙頌茹與男方劃清界線後，顯得十分勞氣，盧巧音更無意間踢爆兩人同居，更自言日後會勸周永恆交朋友要帶眼識人。
盧巧音（Candy）昨日到將軍澳電視廣播城拍攝無綫新劇《天涯俠醫》，提到周永恆（阿Roy）涉嫌藏毒被捕一事，身為契姐的Candy自言十分擔心，問她有否致電對方慰問時，Candy說：「我都未打畀佢，等佢心情平復啲先喇。」
對於周永恆的女友趙頌茹與對方劃清界線一事，Candy顯得十分激動，她說：「人哋都唔認阿Roy，重同佢劃清界線，咁我點認佢做弟婦呀！」
Candy昨日激動之餘，更無意中踢爆周永恆與阿Yu同居，問她是否對阿Yu劃清界線一事不滿，Candy說：「唔係！我只係覺得係咪大難臨頭各自飛先，大家都有工作上嘅前途，大家又住埋一齊，應該一齊去承擔，唔係我有事你走先嘅。我向來都當阿Roy係細佬，我覺得佢咁樣好唔啱，女方可能有公司嘅掣肘，可能佢都要尊重公司嘅安排。」
Candy自言起初對阿Yu的印象不錯，她說：「之前細佬同我講，話識咗個女仔，我都希望佢哋穩穩定定，我原本都覺得呢個女仔幾好，但𠵱家就減分數喇，況且我都同佢唔熟。」Candy自言因痛錫契細佬阿Roy才如此激動，她說：「我都希望大家冇事，不過我會叫阿Roy以後要帶眼識人，小心啲！」
採訪、攝影：王崇穎
