賓架W提早退休之後，做個現代陶淵明，租咗一塊新界農田，周末就一家人落田種菜，享田園之樂。聽講中產階級租田種菜（有機菜），係最新嘅環保玩意，為早已冇人耕、荒廢咗嘅農田帶來生氣，旅居英國、荷蘭嘅原居民業主，無端端多咗一筆租金收入。
耕田之餘，賓架W亦報讀北京一間大學嘅考古學課程，到中大校外進修學院上課。最近同賓架W吃飯，問佢有乜耕田考古心得，佢話最近一位北京教授落嚟開壇，講授新石器時代文物，講到匙羹（瓷器）柄點解要開一個窿，大家聽到津津有味。左丁山立即望吓餐枱上啲匙羹，咦，果然個柄係有一個窿嘅噃……聽得津津有味，增加吃飯情趣。
唔使憂柴憂米，有閒情研究吓古董文物字畫，讀吓董橋社長談文藝嘅文章，確係會有文化啲。賓架W個老友證券A介紹左丁山認識一位收藏家T，T先生話：「現在好多本地富翁、富翁第二代忽然發現中國、愛上中國，特別係喺外國商人面前，要演吓自己嘅中國根、中國情。一位公子特登將自己間幾百呎大嘅辦公室重新裝修過，擺晒中國古老傢俬、酸枝枱櫈、清宮座椅，直情係返回滿清末年紫禁城咁嘅feel，鬼佬客入到去，以為主人好有中國文化。究其實，公子自幼留學外國，只識英文，唔多識中文，一味靠包裝而已。」時尚如此，有乜好講喎！公子與同路人，一定會開口愛中國，埋口鬧李柱銘反中亂港㖭。