民意慘遭強姦，喬曉陽掟低一粒「事後丸」，笑笑口走咗，剩番一批港奸，肆意辱罵，又話「敬酒唔飲飲罰酒」，又話「唔鍾意嘅可以唔好喺度住」。好似幾個大漢，幫大佬執手尾，左摑一巴，大罵：「鬼叫你反抗！」另一個右摑多巴，話：「條氣唔順呀？下一世投胎做男人吖！」
若然去家計會求援，又話「邀請外國勢力干涉內政」，報警？佢一個又話「乜差佬掃黃，自己冇食過霸王餐咩？」另一個又話：「係呀，冼錦華又使踎監？」呢啲就係強姦嘅邏輯。正如鄔維庸多年前好有智慧咁教精港人：如果遭受強姦，不如好好享受吓。
不過國家出於一片好心，強姦民意後，實行盲婚啞嫁，最初話支持○七直選後來又改口轉軚嘅民建聯，被扶托九月攻插立法會，做其「哎吔老公」及「便宜新郎哥」嘞。
會唔會出現咁花好月圓、皆大歡喜嘅結局呢？當然就要睇吓九月呢場關鍵性戰役。九月立法會之戰，對於民主派，有如諾滿弟盟軍大反攻，食粥食飯，睇呢一鋪。
九月立法會若然唔可以佔半數，九月後曾蔭權「改革」○八立法會普選，增加功能組別將啲組別亂咁劃，維園阿伯一席，北角福建愛國同鄉會一席、港區人大一席、港區政協又一席，全港歸中愛國傳媒老細又一席，條草案掟入立法會，匆匆通過，以後一世冇仇報。
之不過，若然九月立法會民主派還拖成功，立會有半數，咁就可以攜手合力抗強姦，特府博懵，冇位攝、冇罅入，兼重會俾民主派向要害狠踢幾腳㖭。
好嘞，中方話，若然修改嘅普選方案不獲通過，咁就唔改，原汁原味，○八立法會選舉方式照辦煮碗，對民主派咁亦冇壞，因為經已控制咗過半數議席，以後可以慢慢玩。
因此，港人良心投票，用選票嚟拒奸，至少用選票嚟建築一層安全嘅長城，似乎係最後選擇嘞。
傳真︰2623-9278
電郵︰