自由黨有幾位女強人，周梁淑怡同劉健儀外形已經夠晒硬淨，而梁劉柔芬則外表好似好柔弱，實質一啲都唔簡單。八方日前喺立法會撞到梁太，問呢位紡織及製衣界大阿姐今年係咪冇對手之下連任，佢笑瞇瞇話未知，但係又即時補一句，「業界好想佢帶住大家度過取消配額嘅日子」，又話佢哋都好關心邊境加工區，好希望有所進展。
雙普選冇得搞，中央一定送大禮，睇怕乜都有得傾。當然以梁人大喺中央嘅人脈關係，佢肯定知得多過八方，佢話一直叫中央唔好只聽一啲人講嘢，要聽真正港人嘅心聲喎。咁今次政改好清楚，中央聽晒班商界話，因為一切以維護資本家利益為先。
至於自由黨，梁太好坦白話，今年只許有進帳，自由黨擁有嘅議席只會讓畀自己人，肥水唔會流去別人田，唔怪得周梁一聽到余鵬春吼住佢個批發及零售個位，馬上想打退堂鼓，唔去直選。
傳真︰2623-9278
電郵︰