雖然噚日大市企穩，但成交則繼續萎縮，小初真係悶到幾乎瞓着。
收市後經紀黃打電話報料，話上市夠半年嘅北泰創業（2339）果然真係搞批股，之前嘅傳聞唔係亂吹水。稍後亦有朋友話經紀call佢，問佢要唔要貨？佢雖然冇要到，但聽講傍晚時分，北泰配股已經搞掂晒。
據講北泰係以先舊後新方式，每股定價2.30至2.35元，配售1億股，集資額計落超過2億銀，在如此淡市之中，夠膽伸手要咁多錢，而又有人肯接貨，都咪話唔巴閉。
經紀黃之前都提過，話北泰近排好多嘢搞，既搞合資廠，又在安徽北擴產，咁多計劃梗係需要大量資金，所以批股一事，其實係有迹可尋。
北泰早前股價上過3元水平，噚日則收2.60元，睇嚟配股價唔算貴。但經紀黃話唔好忘記，北泰半年多前上市，當時招股價只係1.35元，至於抵唔抵，就真係見仁見智。
慕容小初