因為廣末涼子大肚辭演韓國電影《風之Fighter》，平山綾最近冷手執個熱煎堆，做咗女主角，佢話自己因此變埋韓國迷。咁啱平山綾同喺日本搵食嘅韓星尹孫河鬼咁老友，於是佢兩個女仔就約埋一齊去漢城幫雜誌影相，順便鬆一鬆。
去漢城飲飲食食影吓相，聽落好似冇乜特別，但對於十幾歲就入娛樂圈、私底下未試過出國旅行嘅尹孫河同平山綾嚟講，樣樣都零舍新奇。做導遊嘅尹孫河，唔知係咪想表現祖國高級嘅一面，一味帶平山綾去最豪嘅地方，包括南韓總統成日去嘅茶館，食千幾蚊港紙得幾塊嘅烤肉，同埋一枱擺滿二十幾碟嘅宮廷菜，搞到我羅拉都流晒口水。
起初平山綾都冇乜異議，但當shopping都去專賣名牌嘅狎鷗亭時，平山綾終於開聲話：「我上次嚟拍戲，有時間都係去明洞行吓，南大門買吓手信咋。」咁係咪嫌尹孫河扮高級、唔啱feel先？
不過最搞笑係尹孫河同平山綾第一次去浸足浴刮腳皮，可能始終唔係太優雅嘅事，又有記者喺度，佢兩個俾人刮到好痛都唔敢叫出聲。