硬碟式MP3機愈嚟愈流行，受歡迎主因當然係其大容量特色，閒閒哋幾GB容量，長氣度足夠當點唱機咁開Party狂歡。繼iPodMini後，韓國品牌COWON亦推出一款硬碟式MP3機，打破厚身缺點，以卡片型纖薄登場。
記者：徐影龍
呢部名為iAUDIOM3嘅硬碟式MP3機，最突破係機身大幅度瘦身，厚度只有14.2mm，近乎硬碟機嘅纖薄極限，比一般FlashMemory式MP3機差不多，整體以卡片式設計呈現，而且機身以全金屬製造，賣相夠吸引之餘，拎上手感覺亦好實淨。iAUDIOM3內置一個20GB硬碟，約可儲存達5,000首MP3音樂，真係聽足一個禮拜再開埋Party，都足夠有餘。
iAUDIOM3另一特色係其線控裝置，機身並不設任何屏幕，只有簡簡單單幾粒播放掣，所有功能應用及音量調校，都靠線控操作。呢個線控耳筒最盞鬼係設有一個大芒，解像度有成128×96，足以顯示6行資料，所有歌手名、曲目等資料均可一次過Show出嚟。iAUDIOM3預計賣價約港幣$3,139，有興趣嘅讀者不妨到其官方網站昅昅。
官方網址：
