恒指最高升過91點,埋單只有10點進帳,算係和氣收場。期指今日結算,結算過後見真章,估計萬二大關守得住之後,有機會做番好啲。3月份恒指大散1226點,4月至今為止再跌516點,淡友再炒落搵錢嘅水位有限。平淡市中,石油股比較出色。隔晚美國油價再升,產生刺激。
上榜嘅窩輪有3件係中石油(857)嘅Call輪,即9445、9405、9467,全部都係仙輪,壽命剩番1至3個月,溢價由10%至29%。呢啲高溢價輪,風險嗰橛大過利潤嗰橛,炒嘅話,先要有輸到冇渣嘅心理準備。穩打穩紮玩中石油Call輪,正路之選係9901與9343。9901今年8月到期,輪價91仙,溢價1.1%,槓桿率3.9倍。9343年底到期,輪價53仙,溢價4.5%,槓桿率6.7倍。
日日都有啲威水輪,但唔少遲吓會變成死火輪。華晨(1114)由3.10元爬上3.15元,Call輪9300做咗阿一,收2.5仙,彈升32%。6月初到期,計落剩番23個交易日,行使價4元,正股要喺呢段日子升85仙以上,得唔得呀?隻輪大概最後會變成冇渣嗰隻。
中鋁(2600)收4.95元,升3格,Call輪9521收37.5仙,升12%。呢件亦係高危輪,8月底到期,溢價38.9%,槓桿率13.2倍。就算正股因超賣而上升,都好難望有幾十巴仙升幅,到頭來,9521都係瓜多過菜。隻輪行使價6.50元,𠵱家正股5元都唔到,隻輪博唔過。
章盛